Աբդիայի գրքի մեկնությունը
- Details
- Published on Wednesday, 07 September 2011 16:15
Աբդիայի գրքի մեկնությունը
ա. Նախաբան.
Ամենափոքր գիրքն է Հին Կտակարանում (ընդամենը 21 խոսք): Նոր կտակարանում մեջբերումներ չունի, սակայն Երանելի Հերոնիմոսն ասել է. «Թեև ըստ խոսքերի` փոքր մարգարե է, սակայն ոչ` ըստ մտքերի»: Պարունակում է Եդովմի նկատմամբ Աստծու արդարադատությունը, ընդ որում Հին կտակարանում նրա նկատմամբ Աստվածային դատի մասին հիշատակվում է առավել հաճախ, քան հեթանոսական որևէ այլ ժողովրդի մասին (Ես.11.14:34.5-17:63.1-6: Երեմ.9.25,26: 25.17-26:49.7-22: Ողբ 4.21,22; Եզ.25.12-14:35: Հով.3.19: Ամ.1.11,12: Մաղ.1.4):
Աբդիայի գիրքը ներկայացնում է վերոնշյալ մարգարեությունների բուն էությունը:
բ. Հեղինակը.
Հին կտակարանի առնվազն 12 այրեր կրել են Աբդիա անունը (կամ Հովադիա` Տիրոջ ծառան). 1) Աքաաբի տան կառավարիչը (3Թագ.18.3-16), 2) Դավթի շառավիղներից մեկը (1Մն.3.21), 3) Իսաքարի սերնդից Հեզերիայի որդին (1Մն.7.3), 4) Սավուղի շառավիղներից Եսելի որդին (1Մն.8.38:9.44), 5) Երուսաղեմ վերադարձող առաջին ղևտացիներից Շեմայայի որդին (1Մն.9.16:Նեեմ.11.17), 6) Դավթի ռազմիկներից մեկը` Գադի ցեղից (1Մն.12.8,9), 7) Զաբուղոնի ցեղից` Իսմայայի հայրը (1Մն.27.19) , 8) Հովսափատի ժամանակվա իշխաններից մեկը (2Մն.17.17), 9) Հովսիայի ժամանակվա ղևտացիներից մեկը (2Մն.34.12), 10) Եզրասի զինակիցներից Հեքիելի որդին (Եզրաս 8.9), 11) Եզրասի ժամանակվա քահանաներից մեկը (Նեեմ.10.5), 12) Հովակիմ քահանայապետի ժամանակվա ղևտացիներից մեկը (Նեեմ.12.25,26):
Այսուամենայնիվ` հիմքեր չկան նրանցից որևէ մեկին համարելու գրքի հեղինակը:
գ. Գրքի գրման ժամանակը.
Կան երեք ենթադրություններ. 1) Գիրքը գրվել է Հովսափատի որդի Հովրամի թագավորության ժամանակ` Ք.ծ.ա. 892-885թ.թ., 2) Աքազի թագավորության ժամանակ` Ք.ծ.ա. 731-715թ.թ., 3) Ք.ծ.ա. 585թ. բաբելոնացիների կողմից Երուսաղեմի ավերումից հետո:
Պահպանողական աստվածաբանների մի մասը առաջին տեսակետին է, մյուս մասը և լիբերալների մեծամասնությունը` երրորդ:
դ. Պատմական իրավիճակը.
Եդովմացիների և իսրայելցիների միջև թշնամությունը գալիս է Հակոբի և Եսավի միջև եղած պայքարից: Եդովմ վերանվանվել է Եսավը, որ նշանակում է կարմիր: Այդ վերանվանման մեջ դեր է խաղացել նրա` ի ծնե կարմրամորթ և մազոտ լինելը (Ծննդ.25.25), մյուս կողմից` կարմիր ապուրը, որի պատճառով Հակոբին վաճառեց իր անդրանիկությունը (Ծննդ.25.30): Հետագայում Եսավը տեղափոխվել է Սեիրի երկիրը (Ծննդ.36.8,9), որը գտնվում է Մեռյալ ծովի հարավ-արևելյան մասում (այնտեղից դուրս քշելով նախկին բնակիչներին` քոռեցիներին` 2Օր.2.2,12):
Եդովմացիները հրաժարվել են թույլ տալ իսրայելցիներին` անցնելու իրենց տարածքով Քանան գնալու ժամանակ (Թվ.20.14-21): Սակայն Աստված նախազգուշացրել է Իսրայելին նրանց նկատմամբ ատելություն ունենալուց` ազգակցական կապերի պատճառով (2Օր.23.7): Այսուամենայնիվ` երկու եղբայր ժողովուրդների միջև թշնամանքը դարեր շարունակ աճել է: Սավուղ, Դավիթ և Սողոմոն թագավորները միշտ պրոբլեմներ են ունեցել նրանց հետ (1Թագ.14.47: 2Թագ.8.13,14: 3Թագ.11.17-22): Չնայած այն բանին, որ Հուդայի Հովսափատ և Իսրայելի Հովրամ արքաները 4Թագ.3-րդ գլխում դաշինքի մեջ են մտնում Եդովմի հետ` ընդդեմ Մովաբի, սակայն նույն Հովսափատի թագավորության ընթացքում Եդովմը հարձակվում է Հուդայի վրա Ամոնացիների և Մովաբացիների հետ միասին: Այն ավարտվում է իր դաշնակիցների կողմից եդովմական բանակի կոտորածով (2Մն.20.1,2,10,11,22-26): Հովսափատի որդի Հովրամի թագավորության ժամանակ Եդովմը ապստամբում է Հուդայի դեմ և սեփական թագավոր բարձրացնում (4Թագ.8.20-22): Սակայն հետագայում Հուդայի Ամասիա թագավորը ջախջախում է եդովմացիներին և նրանց Սելու (Վեմ) քաղաքը վերանվանում Հեկթովել (Աստծու կողմից խոնարհեցված)` 4Թագ.14.7: 2Մն.25.11,12: Աքաազի ժամանակներում Եդովմը նորից է հարձակվում Հուդայի վրա (2Մն.28.17): Համաձայն 137 սաղմոսի` Ք.ծ.ա. 586թ. Եդովմը ցնծում է Երուսաղեմի ավերմամբ:
Ք.ծ.ա. 6-րդ դարի վերջում և 5-րդ դարի սկզբում Հյուսիսային Արաբիայի բնակիչները եդովմացիների մեծ մասին հեռացնում են իրենց երկրից: Նրանց կողմից հեռացված եդովմացիները հաստատվում են Հուդայի հարավում և երկիրն անվանում Իդումեա: Ք.ծ.ա. 120թ. նրանք նվաճվում են Հովհաննես Հիրկանոս Մակաբայեցու կողմից և ընդունում հուդայիզմ (ինչի մասին վկայում է Հովսեպոս Փլավիոսը «Հրեական հնություններ»-ում): Ք.ծ.ա. 37 - Ք.ծ.հ. 4թ.թ. Հուդայում թագավորող Հերովդես Մեծը եդովմացի է եղել: Ք.ծ.հ. 70թ. եդովմացիները հրեների հետ ապստամբել են Հռոմի դեմ: Այնուհետև պատմական թատերաբեմից անհետացել են:
ե. Բովանդակությունը.
1. Եդովմի կործանման մասին լուրը (1-9).
2. Եդովմի հանցագործությունների մասին (10-14).
3. Աստծու դատն Իսրայելի թշնամիների հանդեպ (15,16).
4. Իսրայել ժողովրդի օրհնությունների մասին (17-21):
1. Աբդիայի մարգարեության առաջին խոսքում կարդում ենք, որ ի պատիժ Եդոմի` Տիրոջ թույլատրությամբ ազգերը պիտի դուրս գան նրա դեմ պատերազմի:
Եվ իսկապես. ա. Հյուսիային Արաբիայի բնակիչները` նաբաթացիները, Ք.ծ.ա 6-5-րդ դ.դ.-ում վտարում են եդոմացիների մեծ մասին իրենց երկրից (Մեռյալ ծովի հարավ-արևելքից).
բ. Ք.ծ.ա. 120թ. Եդոմը նվաճվում է Հովհաննես Հյուրկանոս Մակաբայեցու կողմից և ընդունում հուդաիզմ (Հովսեփոս Փլավիոս, «Հրեական հնություններ»).
գ. 1-ին դարում եդոմացիները կոտորվում են հռոմեացիների կողմից և անհետանում պատմության թատերաբեմից:
Ի՞նչ առնչություն ենք տեսնում Աստծու նպատակների իրագործման և ազգերի պատերազմների միջև.
Աստված, տիեզերքի Իշխանը լինելով, Իր նպատակների իրագործման համար օգտագործում է ազգերին:
2. Ինչպե՞ս բացատրել, որ Եդոմին ազգերի մեջ փոքր և անարգ դարձնելու աստվածային պատիժը երկրորդ համարում ներկայացված է անցյալ ժամանակով.
Այդ ժամանակն օգտագործված է մարգարեական անցյալի իմաստով:
3. Եդոմը հարուստ էր` առևտրական ճանապարհների հատման կետում գտնվելով, բարեբեր հովիտներ ունենալով, երկաթ ու պղինձ արդյունահանելով:
Համաձայն երրորդ խոսքի («Վեմի խոռոջներում բնակվող, որի բնակարանը բարձր է, որ սրտումդ ասում ես` ով կիջեցնի ինձ երկիր»)` ի՞նչ առավելություն էր ստեղծում Եդոմի համար նրա աշխարհագրական դիրքը (ինչի մասին գրում է նաև հռոմեական պատմիչ Պլինիոսը).
Եդոմի լեռնային ռելիեֆը նրան դարձնում էր անառիկ և նպաստում կողոպուտի նպատակով հարձակումներ կատարելուն:
4. 3-րդ և 4-րդ համարները («Թեև արծվի պես բարձրանաս և աստղերի մեջ դնես քո բույնը…», - ասում է Տերը) համադրելով Ես.14.13,14-ում Բաբելոնին վերաբերող մարգարեության («Ասել էիր քո սրտում. «Կբարձրանամ երկինք, Աստծու աստղերից բարձր կդնեմ իմ աթոռը, կնստեմ աստվածների ժողովի լեռան վրա` հյուսիսի ծայրերում, վեր կելնեմ ամպերի բարձրությունների վրա, Բարձրյալին կնմանվեմ…»») և Եզ.28.11-19-ում Տյուրոսին վերաբերող մարգարեության հետ («Սիրտդ հպարտացավ քո գեղեցկությունով, դու ապականեցիր քո իմաստությունը…»)` ի՞նչ ընդհանրություն ենք տեսնում.
Թե' Եդոմի, թե' Բաբելոնի, թե' Տյուրոսի, և թե' ընդհանրապես մարդկային հպարտության արմատները մեզ տանում են դեպի սատանայի` Աստծու դեմ ապստամբությունը և անկումը:
5. Ինչի՞ մասին են մեզ ասում համար 4-ի շարունակությունը («…Քեզ այնտեղից պիտի իջեցնեմ»), Ես. 14.15-20-ը («Բայց դու դժոխքն ես իջել, գուբի խորխորատները…») և Եզ.28.16,17բ,18 համարները («…Ես քեզ իբրև պիղծ հեռացրի Աստծու սարից… Քեզ գետինը պիտի գցեմ… Մոխիր պիտի շինեմ երկրի վրա»).
Հպարտությունը կարող է դարձնել անառիկ ո'չ Աստծու համար:
6. Ինչպիսի՞ պատկերներով է ներկայացված Եդոմի հարստության կողոպուտը 5-6 համարներում.
Եթե կողոպտիչները վերցնում են որքան իրենց է հարկավոր, իսկ խաղողի բերքագողերը գոնե մի քանի ողկույզ թողնում, ապա Եդոմի գաղտնարանները պիտի բացահայտվեն, և նա իսպառ պիտի կործանվի:
7. Ինչպե՞ս է նկարագրված Եդոմի պարտնյորների դավաճանությունը համար 7-ում.
Եդոմի դաշնակիցները նրան երկրից դուրս պիտի վտարեն, խաղաղություն անողները դավադրաբար պիտի հաղթեն, հացը կիսողները որոգայթ պիտի լարեն:
8. Մարդկորեն պաշտպանվածությունից (անառիկությունից), հարստությունից, մարդկանց դաշնակցությունից բացի Եդոմի հպարտության ուրիշ ի՞նչ երկու հիմքերի խարխլման մասին է խոսվում 8 և 9 համարներում, որի զուգահեռը տեսնում ենք Նոր կտակարանում` Կորնթացիների առաջին թղթի 1.27-29-ում («Այս աշխարհի հիմարներին Աստված ընտրեց, որ ամաչեցնի իմաստուններին, տկարներին ընտրեց, որ ամաչեցնի զորավորներին: Աշխարհի անտոհմներին և անարգվածներին Աստված ընտրեց և ոչինչներին, որ մի բան եղողներին ոչնչացնի: Որպեսզի ոչ մի մարմին չպարծենա Նրա առջև»).
Եդոմի նախկինում հռչակված իմաստությունը պիտի անզորանա, իսկ ռազմական ուժը` ամլանա:
9. 11-14 համարներում խոսվում է Երուսաղեմի վրա հարձակվող թշնամու հետ Եդոմի դաշնակցության մասին: Հենրի Հելլիի տեղեկագրքի տվյալները համալրելով Աստվածաշնչի The Full Life Study Bible («Полноценнаяжизнь») հրատարակության մեկնաբանության հետ` ունենում ենք Երուսաղեմի վրա հարձակման հետևյալ 6 դեպքերը.
ա. Եգիպտոսի Սուսակիմ թագավորի կողմից` Ք.ծ.ա 926թ. Ռոբովամի օրոք (3Թագ.14.25,26).
բ. Փղշտացիների և արաբացիների կողմից` Հովրամի օրոք Ք.ծ.ա. 848-841թ.թ. (2Մնաց.21.16,17).
գ. Իսրայելի Հովաս թագավորի կողմից` Ամասիայի օրոք Ք.ծ.ա. 790թ. (4Թագ.14.13,14).
դ. Ասորեստանի կողմից` Աքազի օրոք Ք.ծ.ա. 741-726թ.թ. (2Մն.28.16-21).
ե. Ասորեստանի Սենեքերիմ թագավորի կողմից` Եզեկիայի օրոք Ք.ծ.ա. 701թ. (4Թագ.18.13).
զ. Բաբելոնի կողմից` Ք.ծ.ա. 605-586 թ.թ. (4Թագ.24:25):
Նշված դեպքերից որո՞նց հավանականությունն է ավելի մեծ համարվում` համընկնելու Աբդիայի մարգարեությունում նկարագրված Երուսաղեմի վրա հարձակման հետ.
Բ և զ դեպքերը:
10. 11-14 համարներում Իսրայելի եղբայր ժողովրդի նկատմամբ Եդոմի թշնամանքի նկարագրությունների կողքին նշել համապատասխան համարը.
Երբ օտարները գերում էին իսրայելցիներին, Եդոմը լքում է նրանց. _11_
Ավելին, եդոմացիները միանում են թշնամիներին. _11_
Նա ուրախանում էր Հուդայի որդիների կործանմամբ. _12_
Եդոմը մեծաբերանություն էր անում. _12_
Չարաշահելով Իսրայելի թուլությունը` եդոմացիները նույնպես սողոսկում են
այնտեղ. _13_
Նրանք ձեռք են երկարում հրեաների լքված ունեցվածքին. _13_
Կոտորում են իսրայելցի փախստականներին. _14_
Ոմանց էլ հանձնում են թշնամուն. _14_
11. Եդոմն ի՞նչ հոգևոր ժառանգություն էր ստացել իր նախահայր Եսավից.
Երկրային բարիքների, էգոիզմի գերադասումն Աստծու Թագավորությունից (Ծննդ.25.29,34: 26.34,35: 27.46-28.1):
12. Ինչպե՞ս կարելի է մեկնաբանել 15 ա-ում նշված «Տիրոջ օրը բոլոր ազգերի վրա» արտահայտությունը.
ա. Տիրոջ օրը կարող է նշանակել Աստծու հզոր միջամտությունն աշխարհի կյանքին (Եզ.30.3).
բ. Այն կարող է նշանակել Նրա դատը. 1) Մեծ նեղության ժամանակ, 2) Հազարամյա թագավորությունը հաստատելիս Ազգերի դատի ժամանակ (Մաթ.25), 3) Մեծ դատի ժամանակ.
գ. Աստծու ժողովրդի համար այն խորհրդանշում է Նրա օրհնության ժամանակը:
13. Ինչպե՞ս կարելի է մեկնաբանել 15 բ-ում նշված Եդոմի հատուցումը (Գաղ.6.8` «Ինչ որ մարդ սերմի, այն էլ կհնձի»).
ա. Ի հատուցումն Իսրայելի կողոպուտի (համար 13)` Եդոմը նույնպես պիտի կողոպտվի (համար 6).
բ. Ի հատուցումն Հուդայի փախստականների նկատմամբ թշնամանքի (համար 14)` նրա որդիները նույնպես կկոտորվեն (համար 8).
գ. Ի հատուցումն Իսրայելի դժբախտության վրա ուրախության (համար 12)` նրան կհասնի ամոթն ու բնաջնջումը (համար 10):
14. Ինչպե՞ս կարելի է մեկնաբանել համար 16-ում նշված բոլոր ազգերի խմելը` ի հատուցումն Երուսաղեմում նրանց կազմակերպած գինարբուքի.
Աստծու ժողովրդի նկատմամբ թշնամանքի պատճառով ազգերը պիտի խմեն Տիրոջ բարկության գավաթից (Հայտն. 14.9,10:16.19):
15. Ի հակառակ Եդոմի կործանման` ի՞նչ խոստումներ են տրվում Իսրայելին 17 և 18 համարներում.
ա. Փրկության, սրբության և տարածքների վերականգնման խոստումները.
բ. Հակոբի և Հովսեփի տների նշումն ասում է Իսրայելի վերամիավորման մասին (Երեմ.3.18:Եզեկ.37.16,17:Զաք.10.6).
գ. Հակոբի համեմատումը կրակի, Հովսեփին` բոցի, իսկ Եդոմին` հարդի հետ, ներկայացնում է Աստծու ժողովրդի գերազանցությունը թշնամիների նկատմամբ և վերջինների բնաջնջումը:
16. Ինչպե՞ս է նկարագրված Իսրայելի տարածքային վերականգնումը 19 և 20 համարներում.
ա. Իսրայելի հարավում բնակողները պիտի նվաճեն Եդոմը.
բ. Արևմտյան դաշտավայրում բնակվողները` Փղշտիան.
գ. Եփրեմի և Սամարիայի դաշտավայրերին տիրելն ասում է Հյուսիսային թագավորության տարածքի վերականգնման մասին.
դ. Բենիամինի կողմից Գաղաադի գրավումը` Անդրհորդանանի գրավման մասին.
ե. Պանդխտությունից հայրենիք վերադարձած իսրայելցիները պիտի նվաճեն Քանանը մինչև փյունիկյան Սարեփթան.
զ. Հուդայից ու Երուսաղեմից արտագաղթածները, որ պանդխտացել են Սեփարաթում (այդ վայրի մասին ենթադրություններն Իսպանիայից տանում են մինչև Միդիա), վերադառնալով` պիտի տիրեն հարավային քաղաքներին:
17. Ի՞նչ է հաստատում մարգարեության վերջին 21-րդ խոսքը.
ա. Տերը միշտ Իր ժողովրդի համար բարձրացրել է և բարձրացնելու է ազատարարներ.
բ. Նա պատմության ընթացքը տանելու է` Եկեղեցու միջոցով Իր թագավորությունը հաստատելու ուղղությամբ ողջ Երկրի վրա և ամեն բան բովանդակելու Քրիստոսով. «Աշխարհի թագավորությունները մեր Տիրոջը և Նրա Օծյալինը եղան… հավիտյանս հավիտենից: Գառը… տերերի Տերն է և թագավորների Թագավորը, և նրանք, որ Նրա հետ են կանչված, ընտրված և հավատարիմ են» (Հայտն.11.15:17.14):
Comments: